براكه‌ى خۆم خواى گه‌وره‌ پاداشتى خێرت بداته‌وه‌و هه‌میشه‌ سه‌ربه‌رزو به‌خته‌وه‌رت بكات، له‌رِاستیدا پرۆسه‌ى هاوسه‌رگیرى له‌چاكترین وباشترین ئه‌و كارانه‌یه‌ كه‌ مرۆڤى موسڵمان بیرى لى بكاته‌وه‌و هه‌رچى زووه‌ به‌ئه‌نجامى بگه‌یه‌نێت ، به‌تایبه‌تى بۆئه‌و كه‌سانه‌ى كه‌توانایان هه‌یه‌ (مادى ومه‌عنه‌وى)، چونكه‌ پێغه‌مبه‌رى خوا (صلى الله علیه‌ وسلم) له‌فه‌رمووده‌یه‌كى صه‌حیحدا فه‌رموویه‌تى (یا معشر الشباب من استطاع منكم الباءة‌ فلیتزوج فإنه أغص للبصر وأحصن للفرج)رواه البخاری ومسلم، واتا (ئه‌ى كۆمه‌ڵى گه‌نجان هه‌ركه‌س له‌ئێوه‌ ئه‌گه‌ر ئه‌توانى بۆى گونجاوه‌ با ژنبهێنێت ، چونكه‌ هۆكارێكه‌ بۆپاراستى چاو له‌تێرِوانینى حه‌رام و وقه‌لاَیه‌كى پته‌ویشه‌ بۆ پاراستنى داوین وپاك رِاگرتنى).. هه‌روه‌ها له‌چه‌ندین فه‌رمووده‌ى تریشدا فه‌رمانى به‌گه‌نجان كردووه‌ كه‌ئه‌وانه‌ى توانایان هه‌یه‌ با ژن بهێنن وپرۆسه‌ى هاوسه‌رگیرى به‌ئه‌نجام بگه‌یه‌نن ، له‌شه‌رعیشدا ئافره‌تانى خاوه‌ن دین ورِه‌وشتى به‌رز به‌به‌سه‌ند دانراون كه‌ گه‌نجانى موسڵمان بینخوازن ، به‌لاَم وه‌كو شه‌رع هیچ به‌ڵگه‌یه‌كى صه‌حیح نه‌هاتووه‌ كه‌تایبه‌ت بێت به‌دوعا كردن بۆئه‌و بابه‌ته‌ ، به‌لاَم هه‌رچه‌شنه‌ دوعایه‌كى تر كه‌تیایدا داخوازى له‌خوابكه‌یت بۆئه‌و كاره‌ پیرۆزه‌ تابه‌ئاسانى بۆت بێته‌ ده‌ست ئه‌وه‌ هیچ رِێگرییه‌ك نه‌هاتووه‌ له‌شه‌رعدا وده‌توانى له‌كاتى گونجاودا بیكه‌یت ، به‌تایبه‌ت له‌ دواى شه‌ونوێژو له‌دواى نوێژه‌ فه‌رزه‌كان به‌لاَم بێ ده‌ست به‌رزكردنه‌وه‌ ، هه‌روه‌ها له‌دواى نوێژى چێشت ته‌نگاو، هه‌روه‌ها له‌نێوان بانگ وقامه‌ت، یان له‌كاتى رِۆژوو شكاندندا ، یان هه‌ركاتێكى تر كه‌ له‌شه‌رعدا دیارى كراوه‌و دوعاى تێدا رِه‌د ناكرێته‌وه‌ .. داواله‌خواى گه‌وره‌ ده‌كه‌ین كه‌ كارئاسانیت بۆبكات و هه‌رچى زووه‌ به‌و نیعمه‌ته‌ به‌رزه‌ت شادبكات و ئافره‌تێكى صالیحه‌و چاكت به‌قیسمه‌ت بكات ..اللهم امین

به‌رِێز / سه‌رپه‌رشتیارى ماڵپه‌رِ وه‌لاَمى داوه‌ته‌وه‌.